सरकार हरवले आहे म्हणत चाळीसगावचे आ.मंगेश चव्हाणांनी राज्य सरकारवर डागली तोफ
सरकार हरवले आहे म्हणत चाळीसगावचे आ.मंगेश चव्हाणांनी राज्य सरकारवर डागली तोफ
'सरकार हरवले आहे' प्रिंट केलेला कुर्ता घालून वेधले लक्ष; विधिमंडळाच्या पायऱ्यांवर केले आंदोलन
मुंबई प्रतिनिधी : 'सरकार हरवले आहे' असं प्रिंट असलेला कुर्ता घालून चाळीसगांव मतदारसंघाचे आमदार मंगेश चव्हाण यांनी सोमवारी विधानभवनात प्रवेश केला, सर्वांचे लक्ष वेधून घेत असलेल्या या कुर्त्यावर 'ओबीसी आरक्षण, शेतकऱ्यांना वीज, पूरग्रस्तांना मदत, mpsc नियुक्त्या, नोकर भरती भ्रष्टाचार व इतर मुद्दे प्रिंट केलेले असून या सर्वच मुद्द्यांवर महाविकास आघाडी सरकार अपयशी ठरले असल्याचे त्यांनी माध्यमांसमोर सांगत हा लक्षवेधी कुर्ता परिधान करण्यामागे असलेली आपली भूमिका स्पष्ट केली.
दोन दिवसांच्या सुटीनंतर सोमवारी राज्य अधिवेशन पुन्हा सुरू झाले आहे. त्यातच विधानसभाध्यक्षांची निवडणूक घेण्याची शक्यता असल्याने राजकीय वातावरण तापले होते आणि यातच भाजपने आक्रमक पवित्रा घेत अधिवेशन सुरू होण्याच्या आधी विधीमंडळाच्या पायऱ्यांवर आंदोलन सुरू केले होते.
या आंदोलनात चाळीसगाव विधानसभा मतदारसंघाचे भाजपा आमदार मंगेश चव्हाण यांनी मात्र आपल्या हटक्या आंदोलनाने सगळ्यांचेच लक्ष वेधून घेतले. त्यांनी टोपीसह आपल्या शर्टवर दर्शनी भागात सरकार हरवले आहे असे प्रिंट केले होते तर पाठिमागील भागात वसुली सरकारचा धिक्कार असो असे प्रिंट केले होते. याप्रसंगी प्रसारमाध्यमांशी बोलतांना त्यांनी सरकारवर जोरदार टीकास्त्र सोडले. ते म्हणाले की, राज्यात सध्या अनेक समस्या आहेत. शेतकरी तर समस्यांनी अक्षरश: हैराण झाले आहेत. मात्र त्यांना दिलासा देण्याऐवजी राज्य सरकारचे मंत्री भ्रष्टाचारात मग्न आहेत. या अधिवेशनात जनहिताच्या अनेक प्रश्नांवर चर्चा होणे अपेक्षित होते. तथापि, सरकारने प्रखर विरोधाच्या भितीमुळे अल्प काळाचे अधिवेशन घेतले. यामुळे आम्ही समस्या नेमक्या कुठे मांडाव्यात हा प्रश्न उपस्थित होत आहे. यामुळे शेतकऱ्यांना खांद्यावरून नेण्याची वेळ आलेली आहे.
दरम्यान आमदार मंगेश चव्हाण यांनी यावेळी शेतकऱ्यांच्या वीज बिलांचा मुद्दा देखील उपस्थित केला. ते म्हणाले की, अनेक शेतकऱ्यांच्या वीज जोडण्या तोडण्यात येत असल्याने शेतकरी हतबल झाले असतांना सरकारला याचे काही एक देणेघेणे नाही. सरकारने शेतकऱ्यांना दिलासा द्यावा अशी मागणी देखील त्यांनी केली.
Comments
Post a Comment