'या' नगरसेविकेने दिला शिवसेनेचा तालुका संघटक पदाचा राजीनामा, भाजपा आ.मंगेश चव्हाण यांच्या आंदोलनाला दिला पाठिंबा

भाजपा आमदार मंगेश चव्हाण व शेतकऱ्यांच्या समर्थनार्थ चाळीसगाव शिवसेनेच्या रणरागिणीचा सेनेला जय महाराष्ट्र...

नगरसेविका विजया प्रकाश पवार यांचा शिवसेना तालुका महिला संघटक पदाचा राजीनामा

मी शेतकऱ्याची मुलगी... पण शेतकऱ्यांवर आलेल्या दुर्दैवी वेळेत महाविकास आघाडी सरकारने शेतकऱ्यांच्या पाठीशी उभे राहायला हवे होते परंतु उलट शेतकऱ्यांसाठी आंदोलन करणार्यांनावर गुन्हे दाखल करून अटक करत असल्याची व्यक्त केली खंत...

चाळीसगाव प्रतिनिधी -  शिवसेनाप्रमुख बाळासाहेब ठाकरे यांच्या आक्रमक विचारांनी व आंदोलनांनी प्रेरित होऊन व शेतकरी व सर्वसामान्यांच्या हितासाठी आक्रमकपणे काम करणारी संघटना म्हणून मी शिवसेनेचे काम सुरु केले. मी देखील शेतकऱ्याची मुलगी,पत्नी व बहिण आहे. आमदार मंगेशदादा चव्हाण व शेतकऱ्यांना झालेल्या अटकेमुळे मी व्यथित झाले आहे. शेतकऱ्यांच्या तीव्र स्वरूपाच्या निषेधाच्या प्रतिक्रिया या घटनेमुळे चाळीसगाव तालुक्यातून येत आहेत. जर आपले शिवसेनेचे सरकार असताना शेतकऱ्यांवर अश्या पद्धतीने अन्याय होत असेल तर शिवसेना संघटनेच्या पदावर  राहण्याच्या नैतिक अधिकार मला एक शेतकरी कन्या म्हणून नाही.

शेतकऱ्यांसाठी झटणारा व्यक्ती कुठल्याही पक्षाचा असो त्याच्या पाठीमागे शेतकरी कन्या म्हणून ठाम उभे राहणे मला योग्य वाटते म्हणून आमदार मंगेशदादा चव्हाण व शेतकऱ्यांच्या भूमिकेला पाठींबा म्हणून मी शिवसेना चाळीसगाव तालुका महिला आघाडी संघटक पदाचा राजीनामा देत असल्याचे पत्र चाळीसगाव नगरपालिका विद्यमान नगरसेविका तथा शिवसेना महिला आघाडी तालुका संघटक सौ.विजया प्रकाश पवार यांनी शिवसेना जिल्हाप्रमुख गुलाबराव वाघ यांना दिल्याने एकच खळबळ उडाली आहे.

       शिवसेनेच्या रणरागिणीने घेतलेल्या या शेतकरी हिताच्या भूमिकेचे राजकारणाच्या पलीकडे जाऊन स्वागत होत असून सत्तेत आल्यानंतर शेतकरी हित विसरणाऱ्या राजकीय पक्षांसाठी ही चपराक मानली जात आहे.नगरसेविका सौ.विजया पवार यांनी आपल्या राजीनामा पत्रात अनेक विषय नमूद करत आपली नाराजी व्यक्त केली आहे, त्या लिहितात की, मागील काळात भारतीय जनता पक्षाबरोबर सत्तेत असूनदेखील शेतकऱ्यांच्या हितासाठी शिवसेना पक्षाने वेळोवेळी आवाज उचलला. शिवसेना पक्षप्रमुख मा.उद्धवजी ठाकरे साहेब यांनी देखील शेतकऱ्यांच्या बांधावर जाऊन मदतीचे आश्वासन दिले. तदनंतर भारतीय जनता पक्षाची सत्ता जाऊन मा.उद्धवजी ठाकरे यांच्या नेतृत्वाखाली महाविकास आघाडी सरकार स्थापन झाले व शिवसेनेला मुख्यमंत्रीपद मिळाले.आता शेतकऱ्यांच्या समस्या संपून त्यांना चांगले दिवस येतील, त्यांना नुकसानीची मदत मिळेल, त्यांना नियमित वीज मिळून शेतीला पाणी मिळेल अशी अपेक्षा होती मात्र आज याउलट परिस्थिती राज्यात दिसत आहे.

       महाविकास आघाडीत सहभागी राष्ट्रवादी व कॉंग्रेस या पक्षांमुळे कदाचित मा.मुख्यमंत्री महोदय यांना शेतकरी हिताचे निर्णय घ्यायला अडचणी येत असतील अशी शंका येते,कारण राज्यात उर्जा खाते कॉंग्रेस पक्षाकडे आहे मात्र आज चाळीसगाव तालुक्यातील शेतकरी गारपीट व वादळी पावसामुळे अडचणीत असताना व त्यांच्या उभ्या पिकांना शेवटचे एकदोन पाणी देणे बाकी असताना जवळपास ७ हजार वीज जोडण्या कट करण्यात आल्या. आपले सरकार भाजपासोबत सत्तेत असताना कधीच शेतकऱ्यांचे वीज कनेक्शन कट करण्यात आले नाही. याचा निषेध म्हणून संतप्त झालेल्या चाळीसगाव तालुक्यातील शेतकऱ्यांच्या सोबत आमदार मंगेशदादा चव्हाण यांनी वीज वितरण कंपनीचे अधिक्षक अभियंता यांना जळगाव येथे जाब विचारण्यासाठी गेले असता त्यांनी उडवाउडवीची उत्तरे देणाऱ्या अधिकाऱ्याला दोरीने बांधून आपला निषेध नोंदवला. शेतकऱ्यांच्या भावना वीज वितरण कंपनी व आपल्या महाविकास आघाडी सरकारने समजून घेण्याएवजी उलट आमदार मंगेशदादा चव्हाण व शेतकऱ्यांना अटक केली.

      माझ्याकडे सद्यस्थितीत शिवसेना महिला संघटक म्हणून चाळीसगाव तालुक्याची जबाबदारी आहे. शिवसेना पक्षाने देखील यापूर्वी शेतकऱ्यांच्या हितासाठी वेळोवेळी आक्रमकपणे आंदोलन केली आहेत मात्र आंदोलकांना अश्या पद्धतीने अटक करून त्यांच्यावर गुन्हे दाखल झाले नाही. आज ग्रामीण भागातून मला शेकडो शेतकऱ्यांचे फोन आलेत कि आमदारांनी जे केले ते योग्य आहे कारण आज शेतकऱ्यांची उभी पिके जळत आहेत.त्यांची आज वीजबिले भरण्याची परिस्थिती नाही. शेतकऱ्यांना शासनाने काही काळ संधी दिली पाहिजे होती.

       जर आमदारांनी व शेतकऱ्यांनी आक्रमकपणे आपल्या प्रश्नांसाठी जाब विचारणे गुंडागर्दी असेल तर कुठलीही पूर्वसूचना न देता जबरदस्तीने शेतकऱ्यांचे वीज कनेक्शन कट करणे ही वीज वितरण कंपनीची गुंडागर्दी नाही का ? अश्या प्रकारची सक्तीची वसुली राज्यात आजपर्यंत बघायला मिळाली नसल्याने मी शिवसेना महिला आघाडी चाळीसगाव तालुका संघटक पदाचा राजीनामा देत असल्याचे त्यांनी पत्रात सांगितले आहे.